Лукашэнка трапляе пад юрысдыкцыю міжнароднага трыбуналу за агрэсію супраць Украіны — НАУ

15 траўня на пасяджэння Камітэта міністраў Савета Еўропы ў Кішынёве ад імя 37 дзяржаў было зацверджана Пашыранае частковае пагадненне аб стварэнні спецтрыбуналу за агрэсію супраць Украіны. Пра гэта паведамляе прэс-служба Народнага антыкрызіснага ўпраўлення.

Пад юрысдыкцыю гэтага трыбуналу трапляе і Аляксандр Лукашэнка. Яго прозвішча назваў у сваёй заяве міністр замежных спраў Украіны Андрэй Сібіга.

Кіраўнік НАУ і намеснік кіраўніцы АПК Павел Латушка падкрэсліў, што "гэта вынік працы, якая была праведзена мной і дэлегацыяй Каардынацыйнай рады ў Парламенцкай асамблеі Савета Еўропы. Падчас удзелу ў сесіях ПАРЕ былі прынятыя рэзалюцыі, якія сфармавалі рамкі спецыяльнага трыбунала з юрысдыкцыяй, якая дазваляе разлічваць на прыцягненне да адказнасці Лукашэнкі".

Цяпер каманда НАУ збірае доказы ўдзелу Лукашэнкі і яго саўдзельнікаў у агрэсіі супраць Украіны. Потым іх перададуць створанаму спецыяльнаму трыбуналу.