Мінздароўя закончыла праверку антыбіётыка, які калолі памерлай парадзісе ў Дзяржынску

У Мінздароўя завяршылася праверка антыбіётыка, які калолі памерлай парадзісе ў Дзяржынску. Вынікі даследаванняў атрымала выданне "Зеркало".

Як паведамлялася раней, трагедыя здарылася 8 сакавіка. У 26-гадовай беларускі, якая нараджала першынца, развіўся востры анафілактычны шок. Выратаваць не ўдалося ні жанчыну, ні яе дзіця. У радзільні сказалі, што сярод іншых прэпаратаў жанчыне калолі папулярны антыбіётык цэфтрыаксон беларускай вытворчасці. Пасля гэтага Мінздароўя прыпыніла продаж і выкарыстанне гэтай партыі прэпарата.

Праверкай партыі займаліся дзве лабараторыі — цэнтра экспертыз і выпрабаванняў у ахове здароўя і Рэспубліканскага навукова-практычнага цэнтра трансфузіялогіі і медыцынскіх біятэхналогій. Цэнтр экспертыз і выпрабаванняў прыйшоў да высновы, што ва ўжыванні цэфтрыаксона партыі №51310925 няма "неспрыяльных суадносін "карысць-рызыка". Зыходзячы з гэтага Мінздароўя з 15 траўня дазволіла як продаж, так і медыцынскае выкарыстанне антыбіётыка гэтай партыі.

Мінздароўя не першы раз прыпыняе продаж пэўных партый цэфтрыаксона барысаўскага завода. Так было ў ліпені 2025 года "ў сувязі з наяўнай рызыкай для здароўя пацыентаў пры медыцынскім прымяненні лекавага прэпарата". Публічна пра гэта не паведамлялася.

Агулам з 1 студзеня 2020 года па 22 чэрвеня 2025-га непажаданыя рэакцыі на цэфтрыаксон фіксавалі ў 62 пацыентаў. Двое (пажылы мужчына 73 гадоў і 11-месячнае дзіця) упадалі ў кому, але іх удалося выратаваць. Чацвёра памерлі. У іх ліку — 14-гадовая дзяўчынка ў Ельску, у якой здарыўся анафілактычны шок.