Нацбанк Беларусі трапіў у "чорны спіс" буйнога польскага банка

Польскі банк PKO дадаў Нацбанк Беларусі ў свой "чорны спіс". У яго ўваходзяць фінансавыя ўстановы, з якімі банк PKO не працуе.

Цяпер у гэтым "чорным спісе" значацца 12 беларускіх банкаў. Банк PKO не прымае ад іх плацяжы і не ажыццяўляе пераводы. У гэты спіс увайшлі Абсалютбанк, Альфа-Банк, Белаграпрамбанк, БелВЭБ, Белінвестбанк, "Сбер Банк", "Дабрабыт Банк", Белгазпрамбанк, Банк ВТБ, а таксама банк "Гандлёвы капітал" і "Банк развіцця".

Да іх дадаўся і Нацбанк. Магчыма, гэтае рашэнне звязана з апошнімі санкцыямі ЕС, якія забараняюць здзелкі з лічбавым рублём і крыптарэзідэнтамі з Беларусі.

У "чорны спіс" PKO не трапіў "Цэптэр Банк", але ён і так знаходзіцца пад міжнароднымі санкцыямі.

Застаюцца Беларусбанк, Прыёрбанк, Статусбанк, БНБ-банк, МТБанк, Тэхнабанк, РРБ-банк, "БТА Банк" і "БСБ Банк". Частка з іх трапіла пад абмежаванні Канады, але ў прынцыпе міжнародныя пераводы праз іх правесці магчыма.