Навапалачанка шукае бацьку, які знік на вайне ва Украіне
Дзмітрый Слоцін і яго дачка / Скрыншот
Аляксандра Багданава (Слоціна) запісала відэазварот пра свайго бацьку, які знік на вайне ва Украіне. 56-гадовы жыхар Наваполацка Дзмітрый Слоцін стаў расійскім наймітам і з 29 студзеня лічыцца зніклым без вестак.
Слоцін у свой час працаваў на "Нафтазаводмантажы". А апошнія гады, мяркуючы па ўсім, правёў у Расіі. Кантракт з расійскай арміяй ён падпісаў у Нагінску. Праходзіў службу ў мотастралковым палку. Апошні раз выходзіў на сувязь 4 студзеня 2026 года.
Дачка звярнулася ў розныя дзяржорганы РФ — Мінабароны, Следчы камітэт, вайсковую паліцыю, вайсковую пракуратуру. Ёй не адказалі ва ўстаноўленыя тэрміны. Яна збіраецца падаць заяву на бяздзейнасць расійскіх органаў.
