Памочнікі мігрантаў супрацоўнічаюць са спецслужбамі РБ — намміністра МУС Польшчы

Намеснік кіраўніка МУС Польшчы абвінаваціў арганізацыі, якія дапамагаюць мігрантам у Тэрэспалі, у сувязях з беларускімі спецслужбамі

Некаторыя няўрадавыя арганізацыі, якія дапамагаюць мігрантам на польска-беларускай мяжы, супрацоўнічаюць з беларускімі спецслужбамі. Такое меркаванне выказаў у СМІ намеснік кіраўніка МУС Польшчы Мацей Душчык, калі расказваў пра сітуацыю ў пункце пропуску Тэрэспаль. Гэтым ён справакаваў скандал у польскіх СМІ, заўважыла выданне MOST.

Чыноўнік не назваў арганізацыі, якія мае на ўвазе. Аднак у Польшчы толькі дзве арганізацыі дамагаюцца ў Еўрапейскім судзе па правах чалавека ўвесці часовыя меры забеспячэння, каб перашкодзіць дэпартацыі мігрантаў, якія спрабуюць трапіць у Польшчу праз пераход "Брэст — Тэрэспаль". Гэта Hope&Humanity Poland і Інстытут у абарону прававой дзяржавы.

Кіраўнік Інстытута Томаш Сенёў запатрабаваў ад Душчыка выбачыцца ці назваць, якія менавіта арганізацыі супрацоўнічаюць з беларускімі спецслужбамі: "Калі ў нашай дзяржаве дзейнічаюць агенты рэжыму Лукашэнкі, іх варта прыцягнуць да крымінальнай адказнасці, а не казаць пра гэта ў СМІ, збіваючы з панталыку недасведчаных слухачоў".

Малгажата Рыхарская з Hope&Humanity пракаментавала выказванне прадстаўніка МУС саркастычна: "І мы, і Інстытут у абарону прававой дзяржавы ведаем, калі людзі, для якіх мы рыхтуем дапамогу, з'явяцца на пагранічных пераходах, што — на думку міністра — павінна быць доказам супрацоўніцтва. Мы выкарыстоўваем для гэтага магічную тэхналогію пад назвай інтэрнэт".