Ператрус у Андрэя Кудзіненкі быў звязаны з кінашколай "КінаКалайдар"

Ператрус, які сілавікі правялі ў рэжысёра Андрэя Кудзіненкі, быў звязаны з працай прыватнай кінашколы "КінаКалайдар". Пра гэта ён расказаў у гутарцы з тэлеканалам "Белсат" пасля ўцёкаў з Беларусі.

Сілавікі прыйшлі да Кудзіненкі зранку 22 ліпеня. Яны не пазванілі ў дзверы, а адразу пачалі моцна грукаць і крычаць. Калі рэжысёр адчыніў, яму начапілі кайданкі і пачалі ператрус, які цягнуўся некалькі гадзін. Потым яму дазволілі апрануцца і зноў у кайданках павезлі ў памяшканне кінашколы.

У пастанове на ператрус гаварылася пра пошук "экстрэмісцкіх дакументаў" і сімволікі. Супрацоўнікі КДБ таксама распытвалі Кудзіненку пра магчымае фінансаванне школы з-за мяжы. Рэжысёр кажа, што праект "КінаКалайдар" існаваў толькі за кошт аплаты навучэнцаў, афіцыйна заключаў дамовы і плаціў падаткі.

Акрамя таго сілавікоў цікавіла спроба школы атрымаць падтрымку ад ЮНЕСКА. "Я кажу: ЮНЕСКА ж не экстрэмісцкая арганізацыя. І грошы мы адтуль не атрымалі. Інфармацыю пра гэтую магчымасць я ўвогуле знайшоў на "Беларусьфільме", — згадвае Кудзіненка.

Хаця падчас ператрусаў ні забароненай сімволікі, ні доказаў нелегальнага фінансавання сілавікі не знайшлі, яны прыгразілі Кудзіненку пазбаўленнем волі на тэрмін ад 8 да 12 гадоў.

Рэжысёр кажа, што ў ператрусе ўдзельнічалі два старшыя лейтэнанты КДБ — Лапацін і Белаванаў.

Кінашкола "КінаКалайдар" працавала каля трох гадоў. Кудзіненка быў яе ініцыятарам і выкладчыкам, пазней стаў суўладальнікам. Калі ў былой дырэктаркі пачаліся праблемы з сілавікамі, рэжысёр выкупіў яе долю, перарэгістраваў кінашколу на сябе. А праз дзень пасля завяршэння рэгістрацыі да яго прыйшлі сілавікі.

У школе працавалі каля пяці выкладчыкаў, іх колькасць змянялася ў залежнасці ад курсаў. Навучэнцам выкладалі рэжысуру, сцэнарнае і акторскае майстэрства, анімацыю, ладзілі лекцыі і кінапрактыкумы.

Паводле Кудзіненкі, сілавікі выказвалі прэтэнзіі за тое, што школа называецца незалежнай і не фінансуецца Міністэрствам культуры.

Пасля ператрусу памяшканне кінашколы не апячаталі, але забаранілі праводзіць заняткі. На думку Кудзіненкі, улады знойдуць фармальную падставу для ліквідацыі ўстановы.