Праект беларускага порта на Далёкім Усходзе адпраўлены ў рэзерв
Марам Лукашэнкі не наканавана здзейсніцца? Не дапамогуць і кітайцы / Wiki
Губернатар Прыморскага краю Расіі Алег Кажамяка паведаміў, што праект будаўніцтва беларускага порта на Далёкім Усходзе пераведзены ў рэзерв.
"Што датычыцца гэтага праекта: мы трымаем яго ў рэзерве. Калі эканамічная сітуацыя складзецца крыху лепш, мы абавязкова яго запусцім. Час санкцыйнага ціску, трэба крыху пачакаць", — заявіў Кажамяка пасля сустрэчы з Аляксандрам Лукашэнкам.
Губернатар дадаў, што праект "без партнёраў з Беларусі не будзе рэалізаваны".
У сакавіку 2025 года Кажамяка ўжо пераносіў тэрміны рэалізацыі, спасылаючыся на высокую ключавую стаўку Цэнтральнага банка Расіі. Прыцягнуць кітайскія інвестыцыі не ўдалося.
Адзначым, што таксама замарожаны праект "беларускага" порта на Балтыцы. Гаворкі няма нават пра пашырэнне транспартных падыходаў да балтыйскіх партоў Расіі праз высокі кошт праекта і адсутнасць сродкаў на яго рэалізацыю.
На гэтым фоне беларускія грузы сутыкаюцца з нарастаючымі праблемамі ў расійскіх партах, паведамляла "Супольнасць чыгуначнікаў Беларусі".
Нагадаем, што на нарадзе Міністэрства транспарту Беларусі лагісты і экспедытары зафіксавалі недахоп флоту, абмежаванасць тэрмінальных магутнасцяў і прыярытэтнае размеркаванне рэсурсаў на карысць расійскіх грузаадпраўнікоў.
Затрымкі беларускіх грузаў на партовым этапе могуць дасягаць некалькіх тыдняў. Асаблівыя цяжкасці адзначаюцца ў порце Бронка — ключавым звяне экспартнай кантэйнернай лагістыкі беларускага калію.
Парты Расіі падвяргаюцца пастаянным атакам Узброеных сіл Украіны, што не дазваляе ім аднавіць працу ў поўным аб'ёме.
