Прэм’ер Венгрыі ў размове з Пуціным назваў сябе “мышкай, якая дапамагае льву”

Размова пачалася з таго, што Орбан павіншаваў Пуціна з днём нараджэння (на пачатку кастрычніка яму споўнілася 73 гады), а завяршылася тым, што абодва лідары пацікавіліся станам здароўя адзін аднаго.

“Я займаюся спортам, таксама катаюся на лыжах. Я ведаю, што вы гуляеце ў футбол”, — сказаў расійскі прэзідэнт, згодна са стэнаграмай. “Я стараюся”, — адказаў Орбан, выклікаўшы смех у абодвух. Затым венгерскі прэм’ер падзякаваў Пуціну і развітаўся па-руску.

Значную частку размовы абодва прысвяцілі ўзаемнаму выказванню ўдзячнасці адзін аднаму, а таксама прэзідэнту ЗША Дональду Трампу. З ім яны размаўлялі напярэдадні пра магчымы саміт у Будапешце, які ў выніку не адбыўся.

ЗША і Расія не змаглі дамовіцца па максімалісцкіх патрабаваннях Масквы па Украіне. Ён павінен быў адбыцца пасля сустрэчы Трампа і Пуціна ў Анкарыджы, штат Аляска, у жніўні.

У размове Орбан апісаў сяброўства з Пуціным як такое, што ўмацавалася з моманту яго пачатку ў родным горадзе расійскага лідара Санкт-Пецярбургу ў 2009 годзе.

Пуцін жа рассыпаўся ў пахвалах “незалежнай і гнуткай” пазіцыі Венгрыі па яго вайне супраць Украіны. “Нам незразумела, што такая збалансаваная, сярэдзінная пазіцыя выклікае толькі контраргументы”, — сказаў расійскі прэзідэнт, згодна са сцэнаграмай.

Характэрна, што Орбан зрабіў антыўкраінскую рыторыку цэнтральнай тэмай сваёй перадвыбарчай кампаніі. Венгерскі ўрад блакуе крытычна важны крэдыт Украіне на суму 90 млрд еўра, а ў мінулым месяцы ўлады канфіскавалі валюту, якая перавозілася з Аўстрыі ва Украіну па сушы праз Венгрыю. Краіна таксама працягвае імпартаваць расійскую энергію, у той час як ЕС адмаўляецца ад яе.

Таксама, згодна са стэнаграмай размовы, з якой азнаёміўся Bloomberg, Пуцін выклаў Орбану крокі, якія маглі б прывесці да правядзення саміту ў Будапешце, пачынаючы з магчымай сустрэчы Лаўрова з дзяржсакратаром ЗША Марка Рубіа перад вызначэннем “адпаведнага ўзроўню прадстаўніцтва”.

Прэзідэнт прапанаваў прыцягнуць міністра замежных спраў Венгрыі Петэра Сійярта да гэтых абмеркаванняў, гаворыцца ў стэнаграме. Сустрэча Рубіа і Лаўрова ў выніку не адбылася.

Раней стала вядома, што Сійярта лабіяваў зняцце еўрапейскіх санкцый з канкрэтных асоб і кампаній Расіі. У СМІ апублікавалі праслухоўкі размоў венгерскага палітыка з кіраўніком расійскага МЗС Сяргеем Лаўровым і намеснікам міністра энергетыкі Расіі Паўлам Сарокіным.