Расія эвакуявала 81 беларуса, які працаваў на АЭС у Іране
Бушэрская АЭС у Іране / SIPA / East News
Расія эвакуявала 81 грамадзяніна Беларусі, які працаваў на Бушэрскай атамнай электрастанцыі ў Іране. Пра гэта расійскім журналістам расказаў генеральны консул РФ у Ісфахане Андрэй Жыльцоў, заўважыла выданне "Позірк".
Імаверна, гаворка ідзе пра беларусаў, якія з'яўляюцца супрацоўнікамі расійскіх падрадных арганізацый, бо Бушэрская АЭС пабудаваная, абслугоўваецца і падтрымліваецца расійскай дзяржкарпарацыяй "Расатам".
Акрамя беларусаў, паводле Жыльцова, са станцыі эвакуяваныя грамадзяне Таджыкістана (27), Арменіі (4), Узбекістана (3), Казахстана і Украіны (па 1).
Паведамляецца, што спецыялістаў з Бушэрскай АЭС пачалі эвакуяваць пасля эскалацыі канфлікту на Блізкім Усходзе. Раён, дзе размяшчаецца АЭС, быў тройчы атакаваны ў сакавіку, адзін раз — у красавіку. Як паведамляў іранскі бок, у красавіку снарад трапіў у агароджу АЭС, загінуў адзін чалавек.
