Расійскія дроны і ракеты пашкодзілі мноства культурных аб'ектаў Кіева
Наступствы расійскіх удараў па Кіеву / ДСНС Украіны
Расійскі ўдар па Кіеву ў ноч на 24 мая нанёс маштабны ўрон культурнай спадчыне ўкраінскай сталіцы, перадае BBC.
Міністэрства культуры Украіны паведаміла аб пашкоджанні культурных аб'ектаў, помнікаў архітэктуры і кнігасховішчаў. Сярод іх — Нацыянальны музей "Чарнобыль", Украінскі дом, Малая опера, культурная прастора Hinaus, Жытні рынак, Інстытут літаратуры імя Тараса Шаўчэнкі, будынак Нацыянальнага мастацкага музея і іншыя аб'екты.
"Нацыянальны музей „Чарнобыль", аб адкрыцці якога пасля рамонту мы пісалі некалькі дзён таму, амаль знішчаны", — паведамілі ў музеі выданню "Украінская праўда". Выбуховая хваля і абломкі таксама пашкодзілі шэраг архітэктурных помнікаў Падола, у прыватнасці Кантрактавы дом.
Паводле інфармацыі мэра Кіева Віталя Клічко, у выніку атакі пацярпеў 81 жыхар Кіева, сярод параненых — трое дзяцей. Двое чалавек загінула.
