Стала вядома, колькі мінскіх дзесяцікласнікаў адправяць на ваенныя зборы

Сёлета ў летніх ваенных зборах прымуць удзел больш за 11 тысяч мінскіх дзесяцікласнікаў. Такую колькасць назвала намесніца старшыні Камітэта па адукацыі Мінгарвыканкама Вольга Смірнова.

"Агулам у Мінску ў 10-х класах навучаюцца каля 6 тысяч хлопцаў. У намётавыя лагеры выказалі жаданне адправіцца прыкладна 1400 школьнікаў. Для астатніх вучэбна-палявыя зборы пройдуць, як і раней, у межах горада, на базах цэнтраў дапрызыўнай падрыхтоўкі, пры ўзаемадзеянні з вайсковымі часцямі, ваенізаванымі падраздзяленнямі ды іншымі зацікаўленымі арганізацыямі", — перадаюць "Мінск-Навіны" словы чыноўніцы.

Намётавыя лагеры будуць арганізаваныя ў кожным раёне на базе загарадных аздараўленчых цэнтраў, туркомплексаў і ў вайсковых часцях. Для дзяцей прадугледжаныя харчаванне, пражыванне, вучэбная занятасць і вольны час, паведаміла Смірнова.

Дзяўчынкі, якіх у 10-х класах вучыцца каля 5 тысяч, пройдуць медыцынскую практыку на базе медустановаў. Яны будуць адпрацоўваць навыкі аказання першай дапамогі пры траўмах і няшчасных выпадках, тэхніку накладання павязак і многае іншае.

Без збораў навучанне ў 10-м класе не будзе лічыцца завершаным.

Некаторым школьнікам дазволяць перанесці тэрміны збораў. Але прычына павінна быць важкай — напрыклад, удзел у міжнароднай алімпіядзе, кажа чыноўніца. Тыя, каму стан здароўя не дазваляе пераносіць фізічныя нагрузкі, будуць "праходзіць зборы ў тэарэтычным фармаце".

Дарэчы, бацькоў у палявыя лагеры пускаць не будуць. У асобных выпадках дапушчальная толькі сустрэча на КПП.

Сёлета працягласць палявых збораў для школьнікаў павялічылі з пяці да дзесяці дзён. Пачнуцца яны з 26 траўня.