Суд ЕС адмяніў старыя санкцыі супраць беларускага прадпрымальніка Віктара Шаўцова

Генеральны суд Еўрасаюза адмяніў санкцыі, уведзеныя супраць беларускага прадпрымальніка Віктара Шаўцова ў 2024 і 2025 гадах. У рашэнні суда гаворыцца, што Савет ЕС не змог абгрунтавана даказаць неабходнасць яго ўключэння ў санкцыйны спіс.

Пры гэтым у рашэнні суда дадаецца, што ў лютым 2026 года Савет ЕС зноў уключыў Шаўцоваў ў абноўлены санкцыйны спіс, які будзе дзейнічаць да 28 лютага 2027 года. Законнасць гэтага рашэння ў дадзеным працэсе не разглядалася.

Шаўцоў падаў пазоў 15 кастрычніка 2024 года як рэзідэнт Венгрыі.

ЕС уводзіў санкцыі супраць яго як прадпрымальніка, які атрымліваў выгаду ад рэжыму Лукашэнкі праз бізнес у сферы галаграфіі, так і праз статус ганаровага консула Філіпін у Беларусі, меркаваную сувязь з банкам "Рашэнне" і музейным комплексам "Дудуткі".

Савет ЕС сцвярджаў, што Шаўцоў меў выгаду са штучна створанай беларускімі ўладамі манаполіі ў сектары ахоўных галаграм. Але суд прызнаў даказаным толькі тое, што на момант увядзення санкцый ён меў інтарэсы ў гэтай галіне. На думку суда, не было даказана ні існаванне самой манаполіі, ні выгада Шаўцова ад яе.

Гэтаксама суд прызнаў неабгрунтаванымі аргументы пра статус ганаровага консула Філіпін у Беларусі ды сувязі з банкам "Рашэнне" і комплексам "Дудуткі".

Пад санкцыі ЕС Шаўцоў трапіў у жніўні 2024 года. Гэта адбылося пасля публікацыі Беларускага расследвальніцкага цэнтра пра манаполію на вытворчасць ахоўных галаграм у Беларусі. Сцвярджалася, што бізнесовец быў адным з галоўных бенефіцыяраў. У іншым расследаванні БРЦ даказваў сувязі Шаўцова з кампаніяй, якая атрымала заказ на друкаванне пашпартоў "Новай Беларусі".