Палякі далі грошы на хорар і фестывальную драму, прысвечаныя Беларусі

Польскі кінаінстытут (PISF) падтрымаў новыя праекты беларускіх рэжысёраў Андрэя Кашперскага і Аляксея Палуяна паводле вынікаў сесіі, апублікаваных 7 траўня, піша “Свяшчэнны Белавуд”. 

У межах секцыі “Дэбюты” фінансаванне атрымаў поўнаметражны хорар Андрэя Кашперскага “Суд мёртвых”. Фільм стане развіццём аднайменнай кароткаметражнай стужкі, якую рэжысёр апублікаваў летась.

Агульны бюджэт праекта складае каля 500 тыс. еўра. Польскі кінаінстытут выдзеліў на вытворчасць каля 448 тыс. еўра — амаль 90% бюджэту. Астатнія сродкі аўтары павінны знайсці самастойна.

Дадатковае фінансаванне таксама атрымаў Аляксей Палуян на фільм “Спадчына” ў секцыі міжнароднай капрадукцыі. Стужка будзе прысвечаная беларускай сям’і на фоне палітычнага крызісу пасля 2020 года і пачатку поўнамаштабнай вайны ва Украіне ў 2022-м.

Бюджэт “Спадчыны” складае каля 2,92 млн еўра. Каманда прасіла 708 тыс. еўра падтрымкі, аднак Кінаінстытут выдзеліў палову — 354 тыс. еўра.