У Кіеве арыштавалі кватэру беларускі, якую падазраюць у шпіянажы
Іна Кардаш / фота з яе старонкі ў Фэйсбуку
Суд у Кіеве арыштаваў кватэру грамадзянкі Беларусі Іны Кардаш, затрыманай у студзені 2026 года па падазрэнні ў шпіянажы. Пра гэта паведамляе Радыё Свабода са спасылкай на крыніцы ў праваахоўных органах.
Гаворка ідзе пра забарону на адчужэнне і распараджэнне нерухомасцю, якая знаходзіцца ў прыватнай уласнасці Кардаш.
Суд разглядаў пытанне без удзелу самой падазраванай і яе адвакаткі. Заканадаўства Украіны дазваляе такі фармат у выпадках, калі размова ідзе пра магчымую канфіскацыю маёмасці.
Іна Кардаш падазраецца ў шпіянажы (ч. 1 арт. 114 Крымінальнага кодэкса Украіны). Паводле следства, яна магла збіраць або перадаваць звесткі, якія складаюць дзяржаўную таямніцу, у інтарэсах замежнай дзяржавы. Беларусцы пагражае ад 10 да 15 гадоў пазбаўлення волі з магчымай канфіскацыяй маёмасці.
Менавіта гэта і стала падставай для арышту кватэры.
Разам з тым, паводле працэсуальнага заканадаўства Украіны, падазраваная або яе прадстаўнік могуць абскардзіць гэтае рашэнне, у тым ліку, з-за таго, што яны не прысутнічалі на судовым разглядзе, або калі адпадзе неабходнасць у арышце.
Крымінальную справу супраць Іны Кардаш завялі 16 ліпеня 2025 года. Яе расследуе Галоўнае следчае ўпраўленне Службы бяспекі Украіны. Цяпер жанчына знаходзіцца ў кіеўскім следчым ізалятары.
