У расійскай базе вышуку за паўгода дадалося больш за 1000 беларусаў
Расійская паліцыя, ілюстрацыйнае фота / vecherka-spb.ru
Ад кастрычніка 2025 года па сёлетні красавік у расійскую базу вышуку дадалі 1118 грамадзян Беларусі. Цяпер у ёй 5880 нашых суайчыннікаў, заўважыла "Медиазона".
У расійскую базу вышуку беларускіх грамадзян дадаюць паводле запыту беларускіх уладаў. Гэта азначае, што гэтых людзей шукаюць у дзвюх краінах — у Беларусі і РФ.
Сярод тых, каго дадалі ў вышук за апошнія паўгода, ёсць, напрыклад, вядоўца праекта "Зроблена ў Польшчы" Максім Паршута, аўтар праекта "ЧестнОК Live" і экс-палітвязень Аляксандр Івулін, музычны журналіст і пісьменнік Аляксандр Чарнуха.
Дарэчы, былыя палітвязні даволі часта трапляюць у базу вышуку. Напрыклад, цяпер туды дадалі Вікторыю Кульшу, якую вызвалілі ў снежні 2025-га паводле дамоўленасці адміністрацыі ЗША з рэжымам Лукашэнкі і выслалі з Беларусі. Таксама ў вышук абвешчаныя экс-палітвязні Якаў Шафарэнка і Павел Нікіценка, якіх вывезлі з Беларусі па такой жа дамоўленасці ў верасні 2025-га.
