Уладальнік "МЛ Віцебск" звольніў трэнера, на яго месца разглядаецца расіянін
Дзейнага чэмпіёна прыкметна трасe / Коллаж "МЛ Витебск"
Пасля слабога старту дзейнага чэмпіёна Беларусі "МЛ Віцебск" у новым сезоне ўладальнік клуба Арцём Леонаў вырашыў звольніць амаль увесь трэнерскі штаб на чале з галоўным трэнерам Міхаілам Марцінавічам. Не закранулі толькі расійскага трэнера брамнікаў, які далучыўся да каманды зусім нядаўна.
Як адзначыў уладальнік клуба Леонаў, за апошнія пяць матчаў "МЛ Віцебск" здабыў толькі дзве перамогі, прычым адна з іх — над "Баранавічамі", аўтсайдарамі чэмпіянату. Асаблівае незадавальненне выклікалі хатнія сустрэчы, у якіх каманда не змагла забіць ніводнага мяча.
"Мне вельмі сорамна перад балельшчыкамі за два хатнія паядынкі. Прыйшло шмат гледачоў, а мы забілі нуль галоў. Мне здаецца, усё павінна быць інакш", — заявіў Леонаў.
Паводле яго слоў, думкі пра змену галоўнага трэнера з’явіліся яшчэ пасля паражэння ад мінскага "Дынама" ў Кубку.
Пасля пяці тураў "МЛ Віцебск" ідзе на другім месцы ў чэмпіянаце, адстаючы ад лідара "Дынама-Мінск" на два ачкі.
У Кубку Беларусі каманда ў чвэрцьфінале ў першым матчы прайграла таму ж сталічнаму "Дынама" з лікам 0:2.
Новым трэнерам каманды можа стаць расійскі спецыяліст Магамед Адзіеў. Нягледзячы на наяўнасць на рынку шэрагу беларускіх спецыялістаў з досведам працы на высокім узроўні, такіх як Вадзім Скрыпчанка, Арцём Радзькоў, Іван Маеўскі, Віталь Жукоўскі, выбар зроблены на карысць замежніка.
Апошнім месцам працы Адзіева былі "Крылы Саветаў" з расійскай Прэм’ер-лігі, дзе ён працаваў з чэрвеня 2025 года па красавік 2026-га.
Чакаецца, што новы трэнер можа дэбютаваць ужо ў бліжэйшым матчы супраць мінскага "Дынама".
