Уначы Кіеў атакавалі сотні расійскіх беспілотнікаў і ракеты

У ноч на 14 траўня расійскія войскі зноў атакавалі Украіну, асноўны ўдар нацэліўшы на Кіеў.

Паведамляецца, што расіяне запусцілі 56 ракет і 675 беспілотнікаў. Як адзначае hromadske.ua, 15 ракет і 23 ударныя дроны пацэлілі па 24 лакацыях, а на 18 лакацыях зафіксаванае падзенне абломкаў БПЛА.

У Кіеве выбухі пачаліся ад трэцяй гадзіны ночы. Па стане на раніцу вядома пра аднаго загінулага і 33 пацярпелых чалавек, у іх ліку — немаўля. Ратавальна-пошукавыя работы працягваюцца, таму інфармацыя пра пацярпелых удакладняецца.

У Дарніцкім раёне ўкраінскай сталіцы ў адным з з жылых дамоў абваліліся канструкцыі, пад заваламі засталіся людзі.

У Кіеўскай вобласці ад начной расійскай атакі пацярпелі сем чалавек, сярод іх — дзіця. Мужчыну і жанчыну з асколачнымі раненнямі шпіталізавалі ў клініку.