Ва Украіне затрыманы сын кіраўніцы Місіі дэмакратычных сіл Беларусі
Мікіта Шацілін / rozsliduvach.info
Ва Украіне затрыманы Мікіта Шацілін — сын кіраўніцы Місіі дэмакратычных сіл Беларусі ў Кіеве Святланы Шацілінай. Гэта ў гутарцы з Еўрарадыё пацвердзіла сама спадарыня Святлана.
Пра затрыманне Мікіты паведамілі зранку 29 траўня ўкраінскія медыі. Але афіцыйнага пацвярджэння публікацыі не мелі.
Шацілін — дэпутат гарадскога савета Ірпеня і кіраўнік упраўлення па пытаннях ветэранскай палітыкі ў гарадской адміністрацыі. Затрыманне можа быць звязанае са схемай ухілення ад мабілізацыі.
Мікіта — старэйшы з двух сыноў Шаціліных. Ён ветэран вайны і ўдзельнік баявых дзеянняў з 2014 года. Мікіта ўдзельнічаў у баях за Ірпень і Барадзянку ў 2022 годзе. Ён узнагароджаны ордэнам "За мужнасць" ІІІ ступені.
