Вайсковы суд апраўдаў польскага салдата, які адкрыў агонь на мяжы з Беларуссю
Караль С. падчас паседжання суда / PAP/Wojtek Jargiło
Люблінскі гарнізонны вайсковы суд апраўдаў салдата, якога судзілі за ўжыванне агнястрэльнай зброі на мяжы з Беларуссю. Пракуратура вінаваціла Караля С. у перавышэнні паўнамоцтваў і стварэнні небяспекі для жыцця і здароўя іншых людзей, перадае Польскае радыё.
Інцыдэнт адбыўся ў 2024 годзе ў Падляшскім ваяводстве на мяжы з Беларуссю. Мужчына зрабіў 12 стрэлаў з табельнай зброі ў бок групы з дзесяці мігрантаў, якія спрабавалі незаконна перайсці беларуска-польскую мяжу. Пад абстрэл таксама выпадкова трапілі два польскія афіцэры-памежнікі і два польскія салдаты. Пацярпелых пры гэтым не было.
Суддзя, падпалкоўнік Радаслаў Гунэк заявіў: "Салдат быў адпраўлены на мяжу абараняць яе, і менавіта гэтак ён выконваў сваю задачу". Ён дадаў, што пасля прымянення зброі парушальнікі мяжы ўцяклі, што сведчыць пра надзейную ахову граніцы.
Абвінавачаны ў сваім выступе назваў "сістэмнай праблемай" тое, што дзяржаўныя службы Польшчы і іх супрацоўнікі не знаходзяцца пад абаронай дзяржавы. Караль С. пакінуў войска па ўласным жаданні. Адвакат назваў абвінавачанні супраць свайго падабароннага гіпербалічнымі і заснаванымі на домыслах.
