Затрыманага ў Харкаве беларуса-добраахвотніка перавялі ў лепшую камеру і вяртаюць грошы

Беларускі добраахвотнік Аляксандр Красоўскі ("Жэрар"), затрыманы ў Харкаве 14 сакавіка, застанецца пад вартай мінімум да 14 чэрвеня. Да гэтага ж дня падоўжылі тэрмін расследавання яго справы.

Як перадае Радыё Свабода са спасылкай на інфармаваныя крыніцы, суддзя пастанавіў правесці медагляд беларуса, абгрунтаваўшы гэта артыкулам 206 Крымінальна-працэсуальнага кодэксу Украіны. Адна з нормаў гэтага артыкулу прадугледжвае медагляд у выпадку, калі падазраваны заяўляе на судзе пра гвалт супраць яго ў месцы ўтрымання.

Агляд правялі ў Харкаўскай гарадской лякарні. Журналістам Свабоды там адмовіліся паведаміць прычыны правядзення медагляду.

Таксама ёсць імавернасць, што цяпер Красоўскага перавялі ў камеру з палепшанымі ўмовамі. Украінскае заканадаўства дазваляе такую паслугу за плату. У такой камеры ёсць доступ да інтэрнэту і тэлефона. Падчас апошняга судовага пасяджэння пракуроры прасілі суд забараніць Красоўскаму карыстацца тэлефонам, але суд не знайшоў для гэтага падставаў.

Акрамя таго суд абавязаў следчых вярнуць беларусу 680 тысяч еўра, канфіскаваных падчас ператрусу. На думку суддзі, следства не здолела давесці, што гэтыя грошы належаць затрыманаму і ён іх выкарыстоўваў для крымінальнага правапарушэння.

Раней Красоўскі заяўляў, што гэтыя грошы атрымаў ад іншага чалавека, а той пазычыў іх яшчэ ў пяці асобаў і паказаў адпаведныя распіскі.

Як паведамлялася раней, Красоўскага падазраюць у самавольным пакіданні вайсковай часці, а таксама ў нашэнні, захоўванні, набыцці, перадачы і збыце без законнага дазволу зброі і боепрыпасаў. Беларус ваяваў спачатку ў палку імя Каліноўскага, а потым — у падраздзеле "Тур" у складзе 225-га асобнага штурмавога батальёну, удзельнічаў у Курскай аперацыі. Красоўскі мае ўкраінскія ўзнагароды: з'яўляецца поўным кавалерам ордэна "За мужнасць", мае адзнаку прэзідэнта Украіны "За абарону Украіны", адзнаку Галоўнага ўпраўлення разведкі Мінабароны Украіны "За мужнасць пры выкананні спецыяльных заданняў", знак дэпартамента контрразведкі СБУ, нагрудны знак камандуючага аб’яднаных сіл Узброеных сіл Украіны.