Абразы ксяндза-палітвязня не змаглі прадаць на аўкцыёне
Абраз XVIII стагоддзя, які дзяржава хоча забраць сабе / e-auction.by
Абразы, якія належалі ксяндзу Генрыху Акалатовічу, былому палітвязню, не змаглі прадаць з таргоў.
Абодва аўкцыёны, прызначаныя на 14 траўня, фактычна сарваліся, заўважыла "Хрысціянская візія". На больш танны абраз "Свяціцель Іуліян, біскуп Кенаманійскі" (ХІХ — пачатак ХХ стагоддзя) за 700 рублёў зарэгістраваўся толькі адзін удзельнік. Праз гэта таргі не адбыліся.
Купіць другі абраз "Узняццё Хрыста з труны" XVIII стагоддзя за 4000 рублёў увогуле не знайшлося ахвочых. І менавіта наконт гэтага лота з'явілася важнае паведамленне: спагнанніку прапануюць пакінуць арыштаваную маёмасць сабе ў кошт пагашэння "запазычанасці" па выканаўчай вытворчасці. Іначай кажучы: калі абраз не ўдалося прадаць, яго могуць не вяртаць ўладальніку, а перадаць дзяржаве — менавіта яна выступае спагнаннікам у выпадку са штрафам па прысудзе.
Гэта азначае, што старадаўні абраз можа проста стаць уласнасцю дзяржавы — без усялякіх аўкцыёнаў.
Раней улады канфіскавалі іншую маёмасць ксяндза-палітвязня. Яго аўтамабіль ужо змаглі прадаць.
