Амерыканская баскетбалістка з мінскага клуба "Гарызонт" трапіла ў расійскі вышук

У базу вышуку расійскага МУС дадалі амерыканскую баскетбалістку Доніку Косбі, якая ў складзе мінскага клуба "Гарызонт" выйграла Кубак Беларусі за 2024 год. Яе імя ў базе з'явілася на пачатку красавіка 2026 года, заўважыла "Медыязона".

У картцы не пазначана, паводле якога артыкула і ў якой краіне — у Беларусі ці Расіі — на спартоўку пачалі крымінальную справу.

Сама Косбі пра сваю крымінальную справу даведалася ад журналістаў "Медыязоны". У 2025 годзе яна спыніла гульнявую кар'еру і цяпер працуе памочніцай галоўнага трэнера жаночай баскетбольнай каманды ў кам'юніці-каледжы Місісіпі Галф-Кост.

Яна наракае на складанасці пры перасячэнні мяжы падчас паездак у Беларусь. Паводле Косбі, да яе ставіліся як да злачынцы. Напрыклад, пры вяртанні ў Беларусь пасля адпачынку на Каляды ў 2024 годзе ў яе канфіскавалі заплечнік "для нейкіх тэстаў ці некшталт таго".

"Нейкая лухта, калі шчыра, праз тое, што я амерыканка, якая ўвесь час выязджала і вярталася... Хацелі [знайсці] наркотыкі, але ў мяне, вядома, нічога не было, інакш я б цяпер была ў турме", — згадвае амерыканка.

У Беларусь яе пусцілі, але праз тры тыдні запрасілі на допыт: "Мяне пыталіся, дзе я бывала, з кім, чаму з'язджала і вярталася столькі разоў". Пасля гэтага спартовы агент дзяўчыны вырашыў, што заставацца ў Беларусі стала для яе небяспечна — і яна пакінула краіну. Кантракт з "Гарызонтам" быў скасаваны па пагадненні бакоў праз некалькі тыдняў, у лютым 2025 года.

Чаму на яе пачалі крымінальную справу, Косбі не ведае, але кажа, што цяпер і не падумае ехаць у Беларусь ці Расію.