Беларускіх баксёраў дапусцяць да міжнародных турніраў, але пад строгімі ўмовамі

Арганізацыя Word Boxing (Сусветная федэрацыя бокса) 28 красавіка паведаміла падрабязнасці новай працэдуры AIN-Athlètes Individuels Neutres ("Індывідуальныя нейтральныя спартоўцы"), заўважыў "Позірк".

Гэтая працэдура будзе выкарыстоўвацца для вызначэння ўмоваў, на якіх беларускія спартоўцы змогуць удзельнічаць у міжнародных спаборніцтвах, арганізаваных World Boxing, яго еўрапейскай кантынентальнай канфедэрацыяй — European Boxing ці нацыянальнымі федэрацыямі, якія ўваходзяць у World Boxing.

Дэлегацыям з Беларусі і Расіі не дазволена ўдзельнічаць у спаборніцтвах з нацыянальнымі сцягамі, формай ці гімнамі. Для допуску яны павінны будуць прайсці дэталёвую працэдуру праверкі.

Працэдура была распрацаваная пасля таго, як выканаўчы савет World Boxing на пасяджэнні ў сакавіку 2026 года вырашыў падтрымаць заяўкі Беларускай федэрацыі бокса і Федэрацыі бокса Расіі.

Спартоўцам забароняць выступаць не толькі пад дзяржаўным сцягам, але і з сімволікай нацыянальнай федэрацыі — нават на любой частцы формы. Нейтральную форму павінны насіць таксама трэнеры, дапаможны персанал і афіцыйныя асобы каманды.

Заяўкі ўсіх спартоўцаў будуць правяраць, каб яны не падтрымлівалі вайну ва Украіне; не атрымлівалі аплату ад войска або сілавых структур; не ўваходзілі ў клубы, звязаныя з войскам ці паліцыяй; не ўдзельнічалі ў спаборніцтвах, арганізаваных Міжнародным саветам вайсковага спорту (CISM) ад пачатку вайны. Кошт праверкі кожнага спартоўца павінна загадзя аплаціць нацыянальная федэрацыя.

У чэрвені 2023 года стала вядома, што Міжнародная асацыяцыя бокса (IBA) была выключаная са складу міжнароднага алімпійскага камітэта пасля таго, як у кастрычніку 2022 года дазволіла беларусам і расіянам спаборнічаць з ужываннем дзяржсімволікі.