"Белпол" назваў яшчэ адну кампанію, якая дапамагае РФ у вытворчасці боепрыпасаў
Артылерыйскія боепрыпасы, ілюстрацыйнае фота
Беларускае ТАА "Элементарныя машыны" дапамагае расіянам наладжваць вытворчасць выбухоўкі і боепрыпасаў. Пра гэта даведалася арганізацыя былых сілавікоў "Белпол".
На сайце кампаніі гаворыцца, што яна займаецца "распрацоўкай і вытворчасцю фасовачны-пакавальнага абсталявання, печаў, прамысловых млыноў, змешвальнікаў, робатаў-палетайзераў, растарвальнікаў, а таксама іншых тэхналагічных машын для харчовай, хімічнай і фармацэўтычнай прамысловасці". Кіраўніком і ўладальнікам кампаніі з'яўляецца Дзмітрый Емец.
Паводле звестак "Белпол", не ўся прадукцыя "Элементарных машын" выглядае настолькі мірна. Гэтая фірма зрабіла, паставіла і змантавала на вытворчых плошчах Чабаксарскага вытворчага аб'яднання імя Чапаева лініі працы з алюмініевым парашком, трацілам і гексагенам — ключавымі кампанентамі выбухоўкі артылерыйскіх і рэактыўных снарадаў.
Абсталяванне беларускай кампаніі знаходзіцца ў самым пачатку лініі начыння боепрыпасаў. Задача беларускіх агрэгатаў — вызваліць алюмініевы парашок, траціл ці гексаген з прамысловай упакоўкі без утварэння небяспечных паветраных завісяў ў памяшканні вытворчасці, а потым потым правесці дазаванне кампанентаў выбухоўкі.
Пастаўкі абсталявання адбыліся праз пасярэдніка — расійскае ТАА Кампанія "Дэтрэліт".
У "Белпол" адзначаюць, што беларускае абсталяванне было зроблена на аснове камплектуючых замежнай вытворчасці. Напрыклад, там выкарыстоўваюцца сродкі аўтаматызацыі ад Camozzi, Kinco Electric (Shenzhen) Ltd., італьянскія электрарухавікі ды іншае абсталяванне.
