Бяляцкі распавёў, пра што размаўляў з Папам Рымскім
Алесь Бяляцкі з жонкай падчас сустрэчы з Папам Рымскім / christianvision
Праваабаронца і Нобелеўскі лаўрэат прэміі міру Алесь Бяляцкі распавёў падчас адкрытага уроку беларускай мовы ў касцёле святога Аляксандра ў Варшаве, пра што размаўляў з Папам Рымскім Львом XIV. Іх сустрэча адбылася ў Рыме 27 траўня.
Як піша “Белсат”, Бяляцкі зазначыў, што, нягледзячы на тое, што сустрэча была вельмі кароткай, ён паспеў сказаць, што ў Беларусі сітуацыя з правамі чалавека вельмі цяжкая.
Ён сказаў, што Папа Рымскі падарыў і яму, і яго жонцы па ружанцы, а таксама прыняў ліст, у якім утрымліваецца просьба паўплываць на вызваленне палітвязняў і пазначаныя некаторыя прозвішчы. Цяпер праваабаронца чакае пісьмовы адказ на свой зварот.
Бяляцкі адзначыў, што гэта была першая ягоная сустрэча з Папам. Аднак раней, калі ён сядзеў у Бабруйскай калоніі, яго наведаў тагачасны папскі нунцый Кляўд'ё Гуджэроцці. Сустрэча была нядоўгай, казалі ў прысутнасці начальніка калоніі аб літаратуры — італьянскай і беларускай. Бяляцкі пажартаваў, што рэакцыю начальніка калоніі можна ахарактарызаваць тым самым словам, якое ён напісаў на дошцы – утрапеннем.
