Чыноўнікі расказалі, ці могуць дзесяцікласнікі адмовіцца ад вучэбна-палявых збораў
Школьнікі на вучэбна-палявых зборах / tvgrodno.by
Дзесяцікласнікі не могуць адмовіцца ад вучэбна-палявых збораў. Пра гэта ў эфіры тэлеканала СТБ заявіла намесніца старшыні камітэта адукацыі Мінгарвыканкама Вольга Смірнова.
Бацькі вучняў пытаюцца, ці можна дзіцяці не ўдзельнічаць у зборах. Паводле чыноўніцы, такой опцыі няма, бо гэта частка адукацыйнага працэсу.
"І без адзнакі, атрыманай па выніках вучэбна-палявога збору, дзіця не будзе атэставанае па вучэбным прадмеце "Дапрызыўная і медыцынская падрыхтоўка" за навучальны год. А калі не будзе атэставанае, значыць, не будзе пераведзенае ў 11-ы клас", — тлумачыць Смірнова.
Палявыя зборы ў школьнікаў пачнуцца з 26 траўня. Сёлета яны працягнуцца дзесяць дзён замест ранейшых пяці. Дзяўчаты будуць праходзіць практыку ў медустановах.
