Чыноўнікі сказалі, ці могуць мінскія 11-класнікі не ісці на масавы выпускны

Выпускны вечар для большасці мінскіх 11-класнікаў сёлета пройдзе, як паведамлялася, у новым фармаце. Пасля віншавання ў школах падлеткаў збяруць на буйных гарадскіх пляцоўках з канцэртамі і дыскатэкамі.

На прэс-канферэнцыі ў нацыянальным прэс-цэнтры бацькі пацікавіліся ў чыноўнікаў, ці могуць школьнікі праігнараваць такое мерапрыемства. "Падкажыце, ці можа клас адмовіцца, каб правесці гэты важны вечар разам і сустрэць світанак", — запытаўся адзін з бацькоў.

На гэтае пытанне адказала начальнік аддзела выхаваўчай і ідэалагічнай работы камітэта па адукацыі Мінгарвыканкама Ганна Рысявец.

"У дадзеным выпадку трэба, вядома ж, выслухаць меркаванне саміх выпускнікоў, таму што гэтая праграма, якая прапануецца, — гэта падарунак для выпускнікоў. Падарунак кіраўніцтва сталіцы. Таму, напэўна, было б няправільным, скажам так, прымаць такое вось рашэнне", — адказала чыноўніца.

Паводле яе, з 11-класнікамі трэба правесці размову, "данесці інфармацыю". "І, думаю, што якраз пры такой тлумачальнай працы хлопцы і дзяўчаты прымуць станоўчае рашэнне і прымуць удзел у гэтым мерапрыемстве", — канстатавала Рысявец.

Дарэчы, выпускнікі школаў Фрунзенскага раёна Мінска правядуць гэтыя вечары ў сваіх школах і гімназіях. Чыноўнікі патлумачылі гэта тым, што ў раёне самая вялікая колькасць адукацыйных установаў.