Экс-кіраўнік партыі "Зялёныя" Дзмітрый Кучук адкрыў бізнес у Літве

Былы палітвязень і экс-кіраўнік партыі "Зялёныя" Дзмітрый Кучук адкрыў бізнес у Літве. Ён абраў тую ж сферу, у якой працаваў на радзіме — збор адходаў.

"У Беларусі ў мяне была адна з самых буйных кампаній. У тым ліку яна займалася зборам бытавой тэхнікі на перапрацоўку. Калі я вымушана апынуўся ў Літве, то праз нейкі час вырашыў, што варта ствараць кампанію, якая будзе займацца тым самым", — перадае "Наша Ніва" словы Кучука.

Фірму ён зарэгістраваў тыдзень таму і ўжо знайшоў першых кліентаў.

Кучук кажа, што ў Літве за здачу бытавой тэхнікі плацяць невялікую кампенсацыю толькі тады, калі чалавек сам прывозіць яе ў прыёмны пункт. Калі ж па яе прыязджаюць зборшчыкі, уладальніку не плацяць нічога. "Мы за буйнагабарытную тэхніку гатовы заплаціць сімвалічную суму — і самі ўсё вывезці. Наш мікрааўтобус — гэты мабільны пункт збору", — расказвае ён пра перавагі сваёй кампаніі.

Кажа, што на пачатак справы абышоўся без крэдытаў і інвестыцый — выдаткаваў тыя грошы, якія атрымаў ад "Байсола" як былы палітвязень. У Беларусі ўсе яго рахункі арыштаваныя.