Экс-вайскоўца, які вярнуўся з Польшчы, абвінавацілі па артыкуле для каліноўцаў
Аляксандр Рудчык / фота з ягонай старонкі "Вконтакте"
62‑гадовага брастаўчаніна Аляксандра Рудчыка арыштавалі па абвінавачанні ў тэрарызме і ўдзеле ва ўзброеным канфлікце. Яго судзілі, але дакладны прысуд мужчыну невядомы, піша "Наша Ніва".
Рудчык нарадзіўся 3 красавіка 1964 года ў расійскім Скаварадзіне ў Амурскай вобласці, недалёка ад мяжы з Кітаем. Ён рабіў вайсковую кар'еру, служыў лейтэнантам у Тындзе ў Амурскай вобласці.
Паводле звестак BelPol, у Беларусі мужчына пражыў шмат гадоў і з 2003 года працаваў аўдытарам як індывідуальны прадпрымальнік. ІП ён закрыў пры канцы 2019 года.
У сацсетках Рудчык выказваўся супраць Пуціна і Лукашэнкі.
З 2022-га жыў па-за межамі Беларусі, публікаваў фотаздымкі з Польшчы яшчэ ўвесну 2025-га. Пазней Рудчык чамусьці апынуўся ў Беларусі.
Прысуд яму вынес нядаўна Брэсцкі абласны суд. Сярод артыкулаў, па якіх яго прызналі вінаватым, ёсць стварэнне злачыннай арганізацыі (ч. 2 арт. 285), удзел у тэрарыстычнай дзейнасці (арт. 290-3, ч. 2 арт. 290-4) і ўдзел ва ўзброеным канфлікце на тэрыторыі замежнай дзяржавы (ч. 1 арт. 361-3). Яму пагражала да 20 гадоў калоніі.
Раней па гэтых артыкулах судзілі толькі ветэранаў палка Каліноўскага — Васіля Верамейчыка, Васіля Грачыху і Максіма Ралько. Пра датычнасць Рудчыка да палка Каліноўскага нічога не вядома.
