Іранскую студэнтку ў Беларусі арыштавалі за каментары пра Іран
Хатэрэ Хадададзі / ManotoTV
У Беларусі затрымалі студэнтку-стаматолага з Ірана Хатэрэ Хадададзі. Прычынай затрымання сталі каментары пра Іран у адным з тэлеграм-каналаў. Пра арышт студэнткі расказаў іранскі тэлеканал ManotoTV, які базуецца ў Лондане, заўважыла выданне reform.news.
Паведамляецца, што затрымалі Хадададзі пры ўмяшанні іранскай амбасады ў Беларусі. Яе асудзілі на 14 сутак арышту. Тэлеканал са спасылкай на блізкіх дзяўчыны перадае, што яе мусілі вызваліць 30 красавіка, але дагэтуль студэнтка застаецца пад вартай.
"Таксама паведамляецца, што падчас утрымання пад вартай яна была пазбаўленая доступу да адваката і магчымасці звязацца з сябрамі", — перадае ManotoTV.
Хатэрэ Хадададзі вучыцца на медыцынскім факультэце замежных навучэнцаў Беларускага дзяржаўнага медуніверсітэта. Яна была заяўлена для ўдзелу ў студэнцкай канферэнцыі ў Мінску 29-30 красавіка з працай "Беласнежная ўсмешка — дар прыроды або дасягненне медыцыны?"
