Кацярына Андрэева просіць Джона Коўла дапамагчы вызваліць яе мужа
Кацярына Андрэева / фота з яе старонкі ў Фэйсбуку
Былая палітзняволеная журналістка Кацярына Андрэева звярнулася да спецпасланніка ЗША па Беларусі Джона Коўла з просьбай дапамагчы вызваліць яе мужа — журналіста Ігара Ільяша. Адпаведны зварот яна размясціла ў сваіх сацсетках.
"Ігар прысвяціў журналістыцы амаль 20 гадоў жыцця. Гэта выбітны прафесіянал і годны чалавек, які не з’ехаў, пакуль я была ў калоніі. Не пакінуў мяне. Не абраў уласную бяспеку.
Сёння Ігар — у калоніі №2, у складаных умовах. Ягонае здароўе патрабуе пільнай увагі і якаснай медычнай дапамогі. Як жонка я баюся за стан свайго мужа", — заяўляе Андрэева.
Яна адзначае, што з дзевяці гадоў у шлюбе разам з мужам яны адзначылі толькі тры гадавіны: "Я ўпэўненая, што ў Вашых сілах зрабіць так, каб дзясятую мы адсвяткавалі разам — і на свабодзе!"
Ігар Ільяш быў асуджаны ў верасні 2025-га на чатыры гады зняволення за каментары, якія ён даваў беларускім недзяржаўным і замежным СМІ.
