Мікрачыпы і платы для расійскіх ракет і "Арэшніка" вырабленыя мінскім "Інтэгралам"
Еўрапейскім амбасадарам паказалі кампаненты расійскіх ракетаў / Офіс прэзідэнта Украіны
У расійскіх ракетах, якімі бамбілі Кіеў 24 траўня, выявілі кампаненты, зробленыя на мінскім заводзе "Інтэграл". У іх ліку — мікрачыпы і платы для крылатых ракет і "Арэшніка". Пра гэта ў Офісе прэзідэнта Украіны расказалі еўрапейскім амбасадарам у Кіеве і паказалі рэшткі ракет.
Украінскі бок прадэманстраваў дыпламатам дэталі расійскіх ракет "Цыркон", "Калібр", Х-101 і дронаў "Герань-2". У іх былі кампаненты, вырабленыя ў Швейцарыі, Германіі, ЗША, Вялікабрытаніі, Японіі, Кітаі ды іншых краінах, у тым ліку выпушчаныя сёлета.
Таксама амбасадарам паказалі асобныя платы ад "Арэшніка" з выключна расійскімі і беларускімі кампанентамі, вырабленымі ў 2004-2014 гадах.
"Вам вядома, што Расія заяўляе пра гатоўнасць запускаць больш ракет для паражэння аб'ектаў ва Украіне, асабліва ў Кіеве. Усе бачылі вынікі. Гаворка ідзе не пра нейкія, як яны кажуць, "цэнтры прыняцця рашэнняў", а пра грамадзянскае насельніцтва, пра ахвяры сярод мірных жыхароў. Яны не здольныя наносіць такія ўдары самастойна — без дапамогі або прамысловай базы з іншых краін", — падкрэсліў намеснік кіраўніка Офіса прэзідэнта Павел Паліса.
