Такаеў прапанаваў Пуціну "замарозіць" вайну Расіі супраць Украіны
Пуцін і Такаеў / Акорда
Прэзідэнт Казахстана таксама паведаміў, што атрымлівае "шмат сігналаў з Еўропы і ЗША" наконт расійска-ўкраінскай вайны.
Прэзідэнт Казахстана Касым-Жамарт Такаеў заявіў, што вайну Расіі супраць Украіны неабходна спыніць. Паводле ягоных слоў, тое, што адбываецца, выгадна праціўнікам і Расіі, і Украіне. Пра гэта Такаеў сказаў на XXII Форуме міжрэгіянальнага супрацоўніцтва Казахстана і Расіі ў Омску падчас сустрэчы з Уладзімірам Пуціным.
"Усё гэта трэба спыняць. Паколькі тое, што адбываецца, на мой перакананы погляд, на руку і ў радасць супернікам і Расіі, і ўкраінскай дзяржаве", — заявіў Такаеў.
Прэзідэнт Казахстана таксама паведаміў, што атрымлівае "шмат сігналаў з Еўропы і ЗША" наконт расійска-ўкраінскай вайны. Паводле слоў Такаева, многім, у тым ліку яму самому, не да канца зразумелая прырода гэтага канфлікту. У адказ Пуцін паабяцаў праінфармаваць Такаева "пра ход спраў на ўкраінскім напрамку".
