Пуцін адхіліў ідэю Такаева аб замарозцы вайны ва Украіне, нагадаўшы пра ўмовы Крамля

Прэзідэнт Расіі Уладзімір Пуцін не падтрымаў прапанову аб часовым спыненні баявых дзеянняў ва Украіне, заявіўшы, што далейшае развіццё сітуацыі залежыць ад выканання патрабаванняў Масквы. Пра гэта пасля перамоваў Пуціна з прэзідэнтам Казахстана Касым-Жамартам Такаевым паведаміў прэс-сакратар Крамля Дзмітрый Пяскоў.

Паводле слоў прадстаўніка расійскага кіраўніцтва, Пуцін падрабязна распавёў Такаеву пра сітуацыю на ўкраінскім кірунку і пазіцыю Масквы ў дачыненні да канфлікту. Пяскоў заявіў, што з улікам пазіцыі Кіева "як такая замарозка немагчымая". Ён падкрэсліў, што галоўнай умовай для спынення баявых дзеянняў для Расіі застаецца дасягненне пастаўленых мэтаў. Паводле яго слоў, Масква раней ужо агучвала свае патрабаванні, якія лічыць «зразумелымі і паслядоўнымі».

Пяскоў таксама заявіў, што вайна можа завяршыцца ў бліжэйшы час, калі ўкраінскія ўлады нібыта прымуць адпаведныя рашэнні. Пры гэтым раней паведамлялася, што Пуцін не разглядае кампрамісны варыянт спынення агню па цяперашняй лініі фронту і працягвае настойваць на ўмовах, вылучаных расійскім бокам.