Палітвязень, асуджаны на 13 гадоў, перанёс мікраінсульт і новы суд

У зняволенні адбываецца ціск на 26-гадовага палітвязня Кірыла Ашурка, асуджанага на 13 гадоў пазбаўлення волі. У магілёўскай калоніі №15 яго перыядычна адпраўлялі ў штрафны ізалятар, а потым змясцілі ў памяшканне камернага тыпу, паведамляюць праваабаронцы "Вясны".

Цяпер, паводле звестак праваабаронцаў, палітвязня асудзілі паводле арт. 411 КК (злоснае непадпарадкаванне адміністрацыі калоніі). Згодна з новым прысудам яго перавялі ў калонію строгага рэжыму №9 ў Горках.

Таксама праваабаронцы паведамляюць пра вельмі цяжкі стан здароўя палітвязня. У Кірыла шэраг сур'ёзных захворванняў, а напрыканцы 2025 года ў яго здарыўся мікраінсульт. Паводле інфармацыі "Вясны", з роднымі Кірыл не бачыўся ўжо тры гады.

Кірыл Ашурак асуджаны па "справе Атрадаў грамадзянскай самаабароны" (АГСБ). Разам з ім судзілі Дзмітрыя Сасноўскага, Аляксея Глотава, Наталлю Мацвееву, Вадзіма Гулевіча. Іх абвінавацілі ў спробе падрыву вышкі ВМС Расіі ў Вілейцы, замах на прапагандыста Рыгора Азаронка і спробу падпалу лесанарыхтоўчай тэхнікі ў Бярэзінскім раёне. У тэлесюжэце на дзяржканале АНТ пазней сказалі, што ў арганізацыі дзейнічалі супрацоўнікі КДБ.

Фігуранты справы атрымалі ад 13 да 20 гадоў калоніі.