Родныя Мілінкевіча паведамілі, што патрэбную суму на лекаванне ўжо сабралі
Аляксандр Мілінкевіч / Еўрарадыё
Патрэбную суму на лекаванне палітыка і грамадскага дзеяча Аляксандра Мілінкевіча сабралі за некалькі дзён. Пра гэта ў сацсетках позна ўвечары 28 траўня паведаміла яго жонка Іна Кулей.
Яна напісала, што грошы прыходзілі не толькі праз платформу zrzutka.pl, але і праз PayPal, банкаўскі рахунак і прыватныя пераводы.
"Нашая сям’я неверагодна ўдзячная кожнаму, хто дапамог фінансава, хто ставіў спасылку ў сябе ў сацсетках, хто напісаў цёплыя словы падтрымкі", — напісала Кулей.
Збор на платформе zrzutka.pl плануюць закрыць 31 траўня.
У лістападзе Аляксандру Мілінкевічу зрабілі планавую аперацыю, пасля якой ён не можа акрыяць дагэтуль. У выгнанні ні ён, ні жонка не атрымліваюць пенсіі, таму 26 траўня родныя Мілінкевіча звярнуліся па дапамогу.
