Сілавікі патрабуюць ад рагачоўцаў распіскі аб неперадаванні інфармацыі палітуцекачу

У Рагачоўскім раёне сілавікі масава апытваюць работнікаў сферы культуры, ці кантактуюць людзі з палітуцекачом Дзянісам Дашкевічам. У некаторых просяць распіскі з абяцаннем не перадаваць актывісту ніякай інфармацыі. Пра гэта сам Дашкевіч расказаў выданню "Зеркало".

Дзяніс Дашкевіч — вядомы ў раёне грамадскі актывіст. У 2017-2020 гадах ён узначальваў цэнтр культуры ў аграгарадку Побалава. Таксама ён заснаваў і шмат гадоў рэдагаваў сайт "Рагачоў анлайн". У 2022-м Дашкевіч быў вымушаны пераехаць у Польшчу. А ў 2023-м яго завочна судзілі за публікацыю фота прэзідэнта Польшчы Анджэя Дуды на фоне быццам бы бел-чырвона-белага сцяга (насамрэч гэта былі аб'яднаныя сцягі Польшчы і Венгрыі на адным з мерапрыемстваў).

У 2025-м Дзяніс расказваў, што на яго пачалі крымінальную справу па пяці артыкулах КК. Яго родных наведвалі сілавікі, іх выклікалі на допыты. Паводле Дашкевіча, цяпер да яго сваякоў прадстаўнікі Следчага камітэта прыходзяць раз на квартал — "у рамках вышуковых мерапрыемстваў".

Таксама актывіст кажа, што пра яго пытаюцца ў супрацоўнікаў сферы культуры і людзей, з якімі ён калісьці працаваў: "Наколькі мне вядома, у траўні сілавікі пачалі пытацца пра мяне людзей са сферы культуры ў Рагачоўскім раёне. Да некаторых на працу прыходзіць Следчы камітэт, да кагосьці ўчастковыя".

Паводле Дашкевіча, у людзей правяраюць тэлефоны і сацсеткі, высвятляюць, ці размаўлялі яны з ім. Актывіст кажа, што не вядзе ніякіх перапісак, а калі з кімсьці кантактуе, дык сам выдаляе інфармацыю. "Калі мае кантакты ў чалавека знаходзілі, то гэта фатаграфавалі і ў пратаколе пісалі нешта накшталт "дыялогу не выяўлена". Плюс, наколькі я чуў, у кагосьці бралі распіскі ў духу "абавязваюся не перадаваць яму інфармацыю", — расказвае ён.

Прычыны такой цікавасці з боку сілавікоў Дашкевіч не ведае. Магчыма, яна звязаная з новай крымінальнай справай супраць яго: "Людзям казалі, што праз вышук, пералічвалі мае крымінальныя справы. У асноўным яны за абразу Лукашэнкі. Яшчэ з той інфармацыі, што даведаўся, нібыта на мяне з'явілася крыміналка за "здраду дзяржаве", што я перадаў нейкія звесткі ўкраінскім спецслужбам. Але я з імі не меў кантакту".