У Анджэя Пачобута няма абмежаванняў на вяртанне ў Беларусь — Анжаліка Борыс

Экс-палітвязень Анджэй Пачобут пры жаданні можа вярнуцца ў Беларусь, у яго няма абмежаванняў. "Такое запэўненне мы пачулі сёння ў Белавежы", — напісала ў Фэйсбуку Анжаліка Борыс, экс-кіраўніца неафіцыйнага Саюза палякаў у Беларусі.

Анджэя Пачобута 28 красавіка перадалі ў Польшчу ў рамках міжнароднага абмену "пяць на пяць". На мяжы яго сустракаў прэм'ер-міністр Польшчы Дональд Туск. Паведамляецца, што адразу пасля перасячэння мяжы Пачобут спытаўся, ці можа ён вярнуцца ў Беларусь.

На фота з сустрэчы Туска і Пачобута відаць, што экс-палітвязню аддалі беларускі пашпарт. Дагэтуль большасці палітвязняў, якіх высылалі з Беларусі, дакументы не аддавалі.

Анджэй Пачобут прабыў у зняволенні 1860 дзён — з 25 сакавіка 2021 года. Ён быў асуджаны на 8 гадоў калоніі строгага рэжыму і адмовіўся пісаць памілаванне на імя Аляксандра Лукашэнкі, бо адной з умоў была згода пакінуць Беларусь.