У Беларусі павялічылася колькасць аварыяў на цепласетках — ЖКГ
Аварыя, ілюстрацыйнае фота / dzr.by
У Беларусі вырасла колькасць аварый на цепласетках. За апошні ацяпляльны сезон іх было на 8 болей, чым у папярэднім сезоне. Таксама на 10 выпадкаў больш, чым летась, было аварый на аб'ектах водазабеспячэння. Пра гэта паведамілі ў Міністэрстве жыллёва-камунальнай гаспадаркі.
Асноўнай прычынай у ведамстве назвалі вялікую зношанасць сетак. Немалую ролю адыгралі таксама працяглая эксплуатацыя труб, перапады тэмператур, зрухі грунту, парушэнне герметычнасці стыкаў і выхад з ладу абсталявання.
У ЖКГ кажуць, што для абнаўлення камунальнай інфраструктуры летась замянілі амаль 550 кіламетраў сетак водазабеспячэння, 173 кіламетры каналізацыйных сетак і больш за 304 кіламетры цеплавых сетак.
Сёлета да пачатку наступнага ацяпляльнага сезону плануецца замяніць больш за 328 кіламетраў сетак водазабеспячэння, амаль 150 кіламетраў сетак водаадвядзення і звыш 232 кіламетраў цепласетак.
