Удзел Беларусі ў ядзерных вучэннях Расіі незвычайны — эксперт

Удзел Беларусі ў ядзерных вучэннях Расіі выглядае незвычайна. Такое меркаванне выказвае старшы навуковы супрацоўнік Інстытута ААН па вывучэнні праблем раззбраення Павел Подзвіг.

"Я думаю, гэта планавыя вучэнні Расіі, ёсць таму сведчанні. Але, вядома, незвычайны ўдзел у іх Беларусі", — перадае DW словы эксперта.

Павел Подзвіг мяркуе, што ядзернай зброі на тэрыторыі Беларусі няма, але ёсць інфраструктура па яе разгортванні, сховішчы і спецыялісты з Расіі. Таксама ёсць дамоўленасць, што беларускія вайскоўцы могуць выкарыстоўваць расійскія ядзерныя боезарады на ракетах або самалётах-бамбавіках. "І гэта ўсё таксама трэба адпрацоўваць", — дадае ён.

Аб правядзенні трэніровак па падрыхтоўцы да выкарыстання ядзернай зброі 18 траўня паведаміла Мінабароны Беларусі. 19 траўня расійскае Мінабароны заявіла аб правядзенні трохдзённых вучэнняў, падчас якіх будзе адпрацоўвацца ўжыванне ядзернай зброі. У паведамленні расійскага ведамства гаварылася, што вучэнні праводзяцца ў тым ліку з удзелам беларускага войска.