Вызваленне палітвязняў не сведчыць пра сістэмныя змены ў рэпрэсіях у РБ — еўрадэпутаты

Хаця вызваленне шэрагу палітвязняў з'яўляецца пазітыўным крокам, але яно не сведчыць пра сістэмныя змены ў рэпрэсіўнай палітыцы рэжыму Лукашэнкі. Пра гэта гаворыцца ў заяве Бюро дэлегацыі Еўрапарламента па сувязях з Беларуссю. Заява была прынятая да Дня салідарнасці з беларускімі палітвязнямі, які адзначаецца 21 траўня — у дзень гібелі Вітольда Ашурка.

"Сёння мы выказваем нашу непахісную салідарнасць з больш чым 800 палітычнымі зняволенымі і ўсімі людзьмі, якія пераследуюцца па палітычных матывах, якія застаюцца за кратамі ў Беларусі", — гаворыцца ў заяве еўрадэпутатаў. Яны падкрэсліваюць, што ў Беларусі штодня працягваюцца палітычна матываваныя арышты, пераследы і прысуды.

Палітыкі заклікаюць Еўрапарламент да неадкладнага і безумоўнага вызвалення ўсіх палітвязняў у Беларусі. Таксама яны заклікаюць спыніць незаконную і недапушчальную практыку прымусовага выправаджэння палітвязняў і былых зняволеных з уласнай краіны.

У сваім звароце еўрадэпутаты заклікаюць не толькі спыніць усе палітычныя справы, але і "абвясціць поўную амністыю ўсім асуджаным па такіх падставах, уключаючы гарантыі бяспечнага і годнага вяртання людзей, вымушаных пакінуць краіну".