ЗША ціснуць на Літву для транзіту беларускага калію — СМІ
Беларуськалій / Euroradio
ЗША ціснуць на Літву, каб тая дазволіла транзіт беларускіх калійных угнаенняў. У Вільні "стараюцца зразумець пажаданні" Вашынгтона.
"Да сённяшняга дня, як публічна, так і вам, я паўтараў, што на нас няма ніякага ціску з боку амерыканцаў і ніякіх пытанняў, звязаных з угнаеннямі — як гэтыя санкцыі ўводзяцца і падобнае. Сёння я магу сказаць, што ціск узнікае", — паведаміў міністр замежных спраў Літвы Кястуціс Будрыс на закрытай сустрэчы ў Сейме, піша літоўскае выданне Lrytas.
Міністр таксама расказаў, што Літва "пастараецца зразумець пажаданні" амерыканцаў, але не будзе аўтаматычна выконваць іх.
Сярод іншага, ён падкрэсліў, што Літва не можа самастойна адмяніць санкцыі — усё павінна каардынавацца на еўрапейскім узроўні.
На закрытай сустрэчы дэпутаты з кіруючай Сацыял-дэмакратычнай партыі таксама крытыкавалі Будрыса за тое, што Літва праводзіць знешнюю палітыку "на каштоўнасцях" папярэдняга кансерватыўнага ўрада.
