ЗША хочуць, каб Украіна і Еўрасаюз адмянілі санкцыі на беларускі калій — Bloomberg
Беларуськалій
Кіраўніцтва Злучаных Штатаў падштурхоўвае Украіну зняць абмежаванні на імпарт калійных угнаенняў з Беларусі. Таксама ЗША просяць афіцыйны Кіеў данесці гэтую пазіцыю да кіраўнікоў Еўрасаюза, піша Bloomberg.
Вашынгтон спасылаецца на тое, што зняцце санкцый дапамагло б дыстанцыяваць Беларусь ад Расіі і палепшыць стасункі з Мінскам.
Раней ЗША ўжо знялі санкцыі з "Беларуськалія" ды іншых ключавых прадпрыемстваў у абмен на вызваленне палітвязняў. Аднак пакуль дзейнічаюць санкцыі ЕС, гэта не дае заўважнага эфекту: Беларусь не можа выкарыстоўваць традыцыйныя маршруты праз Балтыйскае мора, якія залежаць ад Польшчы і Літвы.
На мінулым тыдні кіраўнік МЗС Літвы Кястуціс Будрыс на закрытай сустрэчы паведаміў, што з боку ЗША пачаўся ціск наконт транзіту беларускага калію. Пасля гэтага кіраўніцтва краіны заявіла, што не плануе мяняць пазіцыю наконт забароне на транзіт і патлумачыла гэта меркаваннямі нацыянальнай бяспекі.
Акрамя таго ў Літве нагадалі, што транзіт беларускага калію трапіў пад санкцыі ЕС. Bloomberg не бачыць прыкмет таго, каб Еўрасаюз збіраўся аслабіць санкцыі супраць Беларусі.
