62-гадовую ўкраінку амаль год трымаюць на Акрэсціна без прад'яўлення абвінавачвання

З чэрвеня 2025 года ў ІЧУ на Акрэсціна ўтрымліваюць 62-гадовую грамадзянку Украіны Наталлю Баташаву. Як даведаўся праваабарончы цэнтр “Вясна”, жанчыну затрымалі ў Віцебску разам з мужам, лёс якога невядомы да гэтага часу.

— Ужо год Наталлю ўтрымліваюць у невыносных умовах без прад'яўлення абвінавачвання. За кратамі ў жанчыны пачаліся сур'ёзныя праблемы са здароўем, — паведамляюць праваабаронцы са слоў былой сукамерніцы грамадзянскі Украіны.

Наталля Баташава родам з украінскага горада Міргарад. Да затрымання працавала бухгалтаркай у школе. Летам 2025 года Наталля разам з мужам прыехалі ў Беларусь па справах. Паводле былой сукамерніцы жанчыны, муж Баташавай — беларус, былы вайсковец, які шмат гадоў жыў ва Украіне і там праходзіў службу.

Іх затрымалі 23 чэрвеня 2025 года ў Віцебску наўпрост на вуліцы і адразу павезлі ў Мінск.

Наталлю змясцілі ў ІЧУ на Акрэсціна. Жанчыне не тлумачаць прычыну яе знаходжання за кратамі, не прад'яўляюць абвінавачванне, забараняюць сустрэчу з адвакатам і нават не дазваляюць звязацца з роднымі. Як адзначае былая сукамерніца, на Наталлю аказваюць псіхалагічны ціск, таму жанчына знаходзіцца ў цяжкім стане. Таксама вядома, што Наталлю змяшчалі ў карцар.

За час зняволення здароўе Наталлі істотна пагоршылася, але неабходную і якасную медыцынскую дапамогу ёй не аказваюць — толькі перыядычна выдаюць таблеткі, якія ёсць у наяўнасці. У траўні гэтага года яна перанесла як мінімум тры цяжкія прыступы тахікардыі, а раніцамі ў Наталлі здараліся прыступы сур'ёзнага сардэчнага кашлю. Апроч гэтага, за час зняволення ў украінкі здаралася моцнае запаленне падсківічных лімфатычных вузлоў.