Беларусь, імаверна, зноў дапамагае расійскім дронам атакаваць Украіну

У Беларусі, імаверна, аднавіў працу пункт радыёкіравання расійскімі "шахедамі", якія атакуюць Украіну. Толькі цяпер ён дзейнічае не каля мяжы з Украінай, а перанесены ўглыб тэрыторыі. Пра гэта заявіў дарадца Міністэрства абароны Украіны па абаронных тэхналогіях і экспэрт па беспілотніках і радыёэлектроннай барацьбе Сяргей @Флэш@ Бяскрэстнаў.

Ён нагадвае, што некалькі месяцаў таму Украіна здолела спыніць у Беларусі працу пунктаў кіравання расійскімі "Шахедамі". Пра знішчэнне ў Беларусі расійскіх рэтранслятараў расказваў у лютым прэзідэнт Украіны Уладзімір Зяленскі.

"Пры канцы зімы мы спынілі працу пунктаў кіравання "Шахедамі" з тэрыторыі Рэспублікі Беларусь. З тых часоў мы не фіксавалі актыўныя спробы аднавіць працу гэтых пунктаў. Падчас камбінаванай атакі 13 траўня мы зноў зафіксавалі працу радыёмадэмаў на борце БПЛА РФ над нашай тэрыторыяй паблізу межаў РБ", — заяўляе ўкраінскі эксперт.

Паводле Бяскрэстнава, адлегласць ад дронаў да мяжы з Расіяй складае каля 500 км, таму прамы канал кіравання немагчымы. Таксама на такой адлегласці немагчыма кіраваць па радыёсувязі па ланцужку.

"Дапускаю паўторную працу пункту радыёкіравання "Шахедамі" з тэрыторыі РБ, але ўжо на вялікай глыбіні, з сярэдзіны краіны. Пакуль гэта адзінкавыя выпадкі. Сілы абароны Украіны трымаюць гэтае пытанне пад кантролем. Мы ніколі не прымаем ніякіх мер, не маючы 100% упэўненасці", — дадае Бяскрэстнаў.