Двух мінчукоў абвінавацілі ў "здрадзе дзяржаве" за супрацу з BELPOL

Следчы камітэт рапартуе аб завяршэнні расследавання дзвюх крымінальных спраў па "здрадзе дзяржаве".

У адным выпадку гаворка ідзе пра 42-гадовага мінчука, які нібыта збіраў звесткі пра папраўчую калонію №1 у Наваполацку для аб'яднання былых сілавікоў BELPOL. Ён павінен быў разам з іншым чалавекам высветліць умовы ўтрымання асуджаных і ўсталяваць з імі канал сувязі, а таксама здабыць персанальныя даныя супрацоўнікаў. "Гэтыя матэрыялы патрабаваліся дэструктыўным арганізацыям для стварэння сацыяльна-палітычнага напружання і агрэсіі ў грамадстве. У тым ліку для дыскрэдытацыі праваахоўных органаў праз фарміраванне фэйкавых навін аб жорсткім абыходжанні з асуджанымі, якія адбываюць пакаранне, а таксама атрымання персанальных даных супрацоўнікаў для ціску, вярбоўкі і цкавання іх блізкіх", — заяўляюць следчыя.

Таксама паведамляецца, што мінчук сумесна з 36-гадовым "саўдзельнікам" перадаваў прыбытак ад падкантрольнай прыватнай фірмы за мяжу — "экстрэмісцкім фарміраванням Terra Group Event і SSL Production". Гэта польскія івэнт-агенцтвы, з адным з якіх супрацоўнічаў зніклы актывіст Анатоль Котаў.  

Таксама аднаго з іх вінавацяць у тым, што як дырэктар прыватнай фірмы ён незаконна выплаціў сабе дывідэнды без узгаднення з іншымі ўласнікамі. Скрадзены прыбытак арганізацыі ацэньваецца больш як на 240 тысяч рублёў.

Па другой справе аб "здрадзе дзяржаве" праходзіць 68-гадовы пенсіянер Валожынскага раёна. Яго ў ліпені 2022 года нібыта завербавала Галоўнае ўпраўленне разведкі Мінабароны Украіны. Паведамляецца, што пенсіянер за грошы збіраў інфармацыю пра мясцовых міліцыянтаў. Таксама ён нібыта пакідаў у інтэрнэце каментары, "якія распальваюць нацыянальную варожасць у дачыненні да асоб рускай нацыянальнасці".

Усіх трох чалавек узялі пад варту.