"Экстрэмісцкім фармаваннем" прызналі арганізацыю, у якой 2 нобелеўскія лаўрэаты
Беларускі ПЭН прызналі "экстрэмісцкім фармаваннем" / калаж "Вясны"
Арганізацыя літаратараў Беларускі ПЭН прызнаная ў Беларусі "экстрэмісцкім фармаваннем". Такое рашэнне прыняў 27 лютага Камітэт дзяржбяспекі, заўважыў праваабарончы цэнтр "Вясна".
Беларускі ПЭН існуе з 1989 года і з’яўляецца адной з найстарэйшых беларускіх праваабарончых арганізацый. Ён адстойвае свабоду выказвання, змагаецца супраць праяваў нянавісці і прыцягвае сусветную ўвагу да парушэння правоў чалавека ў Беларусі — у тым ліку культурных правоў.
Сярод чальцоў арганізацыі лічацца два нобелеўскія лаўрэаты — Святлана Алексіевіч і Алесь Бяляцкі.
Кіраўнікамі ПЭНа ў розныя гады былі такія вядомыя пісьменнікі, як Рыгор Барадулін, Васіль Быкаў, Уладзімір Някляеў і Святлана Алексіевіч.
