Еўрапарламент патрабуе ад палесцінцаў спыніць антыгабрэйскую прапаганду

Еўрапарламент вырашыў змагацца з антыгабрэйскай прапагандай у палесцінскіх колах.

На прапалесцінскіх дэманстрацыях часта гучыць дозунг "Ад ракі да мора", які лічыцца заклікам да знішчэння дзяржавы Ізраіль. Еўрапейцы азадачаныя тым, што за кошт ЕС дзяцей на Палесцінскіх тэрыторыях падбухторваюць менавіта да такіх тэрытарыяльных прэтэнзіяў. Акрамя таго палесцінскіх дзяцей вучаць, што Ізраіль павінен знікнуць з геаграфічнай мапы, а падручнікі з такім зместам фінансуюцца Еўрасаюзам, піша Bild.

ЕС накіраваў папярэджанне кіраўніку Палесцінскай аўтаноміі Махмуду Абасу. У ім гаворыцца, што сродкі Еўрасаюза для аўтаноміі будуць працягваць паступаць толькі тады, калі ў адукацыі будуць следаваць базавым каштоўнасцям ЕС.

Калі пагроза не дапаможа, Еўрапарламент пагражае замарозіць частку дапамогі палесцінцам.

Ідэю падтрымлівае найбуйнейшая фракцыя Еўрапарламента — Еўрапейская народная партыя: "Неабходныя змены павінны быць даказаныя, інакш выплаты будуць неадкладна спыненыя. Мы не дазволім ні Еўракамісіі, ні Палесцінскай аўтаноміі сысці ад адказнасці", — заявіла еўрадэпутатка Хільдэгард Бентэле, кіраўніца дэлегацыі па сувязях з Ізраілем.

Гаворка ідзе пра мінімум дзясяткі мільёнаў еўра. З 1993 па 2023 год, паводле Еўракамісіі, палесцінцам было вылучана амаль 8,5 мільярда еўра дапамогі. Ад 2023 года экстраная гуманітарная дапамога ЕС для Сектара Газа і Заходняга Берага склала яшчэ 550 мільёнаў еўра.