Генсакратар Кангрэса мясцовых уладаў Савета Еўропы падтрымаў выбары ў беларускую КР
Мацье Мары / coe.int
Генеральны сакратар Кангрэса мясцовых і рэгіянальных уладаў Рады Еўропы Мацье Мары падтрымаў выбары ў беларускую Каардынацыйную раду. Яны пройдуць з 11 да 17 траўня.
Паводле Мары, гэта будзе выразны сігнал рэжыму Лукашэнкі і міжнароднай супольнасці пра тое, што беларускі народ непахісна трымаецца дэмакратычных каштоўнасцяў.
"Гэтыя выбары — не проста акт супраціву аўтарытарызму. Яны ўяўляюць сабой ўсвядомленае будаўніцтва будучыні дэмакратычнай Беларусі. Арганізуючы працэс, ведучы дэбаты і адкрыта супрацоўнічаючы, беларускія дэмакратычныя сілы закладваюць інстытуцыйны падмурак, неабходны для надзейнага пераходу да дэмакратыі", — падкрэсліў ён у сваім звароце.
Генсакратар Кангрэса мясцовых і рэгіянальных уладаў Савета Еўропы звярнуўся да выбаршчыкаў. Ён нагадаў пра важнасць удзелу ў выбарах:
"Кожны пададзены голас — гэта цаглінка ў падмурку свабоднай, суверэннай і еўрапейскай Беларусі. Кангрэс салідарны з вамі і цалкам падтрымлівае вашы намаганні па вызначэнні сваёй дэмакратычнай будучыні".
