Гродзенскія камунальнікі скардзяцца на нашэсце чаек

Гродзенскія камунальнікі сталі скардзіцца, што горад апанавалі чайкі. Па дапамогу яны звярнуліся да навукоўцаў, якія прапанавалі некалькі варыянтаў развязання праблемы, піша мясцовая газета "Перспектыва".

Гродзенскія камунальнікі падпісалі дамову з факультэтам біялогіі і экалогіі Гродзенскага дзяржуніверсітэта імя Янкі Купалы на вызначэнне лакацый чаек і выпрацоўку рэкамендацый па іх выцясненні з асяроддзя пражывання чалавека.

Былі абследаваныя 14 шматпавярховых дамоў у мікрараёнах Дзевятоўка, Альшанка і на праспекце Касманаўтаў. Шмат чаек з'явілася ў раёне вуліцы Паповіча. Там ужо выводзіліся птушаняты, якія восенню адправіліся зімаваць на поўдзень.

Навукоўцы прапанавалі такія метады як прыборку смецця і моху з дахаў, усталяванне загародаў, закрыццё смеццевых кантэйнераў з мадэрнізацыяй накрывак, прымяненне адпужвальных прыладаў.

Паведамляецца, што дазвол на прымяненне ультрагукавых адпужвальнікаў камунальнікі ўжо атрымалі.